برسلز(جسارت نیوز)بلجیم نے ہاکی میچ میں پاکستان کو بآسانی5-1سے شکست دے دی، پاکستان کی طرف سے واحد گول محمد رضوان نے کیا، تفصیلات کے مطابق دورہ یورپ کے تیسرے میچ میں میزبان ٹیم بلجیم نے پاکستان کو ایک کے مقابلے میں 5 گول سے ہرا دیا،بلجیم کے کھلاڑی پورے میچ میں چھائے رہے، پہلے دو کوارٹرز کے اختتام پر میزبان ٹیم کو2-0 کی برتری حاصل تھی، پاکستان کے محمد رضوان نے تیسرے کوارٹر میں گول کرکے برتری کو کم کیا تاہم تیسرے اور چوتھے کوارٹر میں بلجیم کے کھلاڑیوں نے جارحانہ کھیل پیش کیا اور مزید تین گول داغ کر میچ میں فتح حاصل کر لی، پاکستانی ٹیم مزید کوئی گول اسکور نہ کر سکی، واضح رہے کہ اس سے قبل پاکستان نے ہالینڈ کے خلاف دو میچوں کی سیریز 1-1 سے برابر کی تھی، قومی ٹیم اب اسپین کے خلاف دو میچ کھیلے گی۔
