حیدرآباد(اسٹاف رپورٹر)جماعت اسلامی زون پھلیلی پریٹ آباد میں سیاسی کمیٹی کے ذمے داران کا اجلاس منعقد ہوا۔ جس میں خصوصی شرکت امیر جماعت اسلامی ضلع حیدرآباد عقیل احمد خان نے کی، اجلاس میں بلدیاتی انتخابات کے لیے منصوبہ بندی کی گئی، تیاریوں کا جائزہ لیا گیا اور انتخابات کے لیے حکمت عملی پر غور کیا گیا۔اس موقع پر نائب امیر عبدالقیوم شیخ، ناظم پھلیلی پریٹ آباد زون عدنان دانش، جاوید اخلاق بھی موجود تھے۔ امیر جماعت اسلامی ضلع حیدرآباد عقیل احمد خان نے اجلاس سے خطاب کرتے ہوئے بلدیاتی الیکشن کے حوالے سے جماعت کی پالیسی سے شرکاء کو آگاہ کیا اور انہیں بھرپور تیاریوں کی ہدایت کی۔ انہوں نے کہا کہ جماعت اسلامی بلدیاتی انتخابات میں بھر پور حصہ لے گی اور ہر ٹاؤن میں اپنے امید وار کھڑے کرے گی، جماعت اس سلسلے میں تیاری مکمل کرلی ہے، بلدیاتی انتخابات عوام کا بنیادی اور دستوری حق ہے۔ انہوں نے کہا کہ بلدیاتی انتخابات ہمیشہ سے جماعت اسلامی کے لیے امید کی وجہ رہی ہے اور جماعت اسلامی بلدیاتی انتخابات میں ہمیشہ بڑی کامیابیاں حاصل کرتی رہی ہے، جس کی بنیادی وجہ یہ ہوتی ہے کہ اس میں روپے کی ریل پیل اور دھاندلی کے امکانات نہیں ہوتے اور خالص عوام کے ووٹوں سے کامیابی ملتی ہے۔
