پاک فوج کے سابق لیفٹیننٹ جنرل ظہیر الاسلام نے کہا ہے کہ میں سب کو یہ باور کرانا چاہتا ہوں کہ میں کوئی سیاست دان نہیں ہوں بلکہ سچ میں ایک نیوٹرل ہوں۔
میڈیا رپورٹس کے مطابق انہوں نے یہ بات گذشتہ روز راولپنڈی میں ایک تقریب سے خطاب کرتے ہوئے کہی۔ ظہیر الاسلام کا کہنا تھا کہ ہمیں اپنے علاقوں اور برادریوں سے باہر نکل کر ملک کی خوشحالی اور ترقی کے لئے سوچنا ہے۔ میں سمجھتا ہوں کہ اب شاید وہ وقت آ گیا ہے۔
سابق لیفٹیننٹ جنرل ظہیر الاسلام کا کہنا تھا کہ ہمیں یہ نہیں دیکھنا چاہیے کہ امیدوار کون ہے۔ ہم نے یہ دیکھنا ہے کہ کس نظام کو ووٹ دینا ہے اور یہی نظام ہمیں تحریک انصاف میں نظر آتا ہے۔
مٹور کہوٹہ میں جنرل ظہیر الاسلام کی رہائش گاہ معززین علاقہ کا ایک بڑا اجتماع۔
تمام بڑی برادریوں نے پی ٹی آئی کے امیدوار کرنل شبیر اعوان کی حمایت کا اعلان کر دیا۔
تقریب سے مستعفی ایم این اے صداقت علی عباسی، کرنل شبیر اعوان اور جنرل(ر) ظہیرالاسلام صاحب نےخطاب کیا pic.twitter.com/8Mg6Xb4FhT
— Sadaqat Ali Abbasi (@Sadaqat_Ali) June 26, 2022
خبریں ہیں کہ سابق لیفٹیننٹ جنرل ظہیر الاسلام نے جس تقریب سے خطاب کیا، وہ حلقہ پی پی 7 راولپنڈی میں منعقد کی گئی تھی۔ اس میں تحریک انصاف کے امیدوار کرنل ریٹائرڈ شبیر اعوان کی بھرپور حمایت کا اعلان کیا گیا۔
خیال رہے کہ سابق لیفٹیننٹ جنرل ریٹائرڈ ظہیر الاسلام 2012ء میں آئی ایس آئی کے سربراہ بنے تھے۔ ان کا تعلق پاک فوج کے 55ویں لانگ کورس اور پنجاب رجمنٹ سے تھا۔ 2010ء ان کو میں لیفٹیننٹ جنرل کے عہدے پر ترقی دی گئی تھی۔ اس کے بعد تھری سٹار جنرل کے طور انہوں نے 2 سال یعنی 2012ء تک کور کی کمان کی اور پھر آئندہ 2 سالوں تک پاک فوج کی خفیہ ایجنسی آئی ایس آئی میں تعینات ہوئے۔
اس سے قبل وہ مری کے جی او سی رہے اور سیاچن میں بریگیڈ بھی کمانڈ کی۔ ان کے والد بھی پنجاب رجمنٹ سے تعلق رکھتے تھے۔
سابق ڈی جی آئی ایس آئی جنرل ریٹائرڑ ظہیرالاسلام کا پنجاب کے حلقہ پی پی 7 راولپنڈی میں پاکستان تحریک انصاف کے امیدوار کرنل ریٹائرڑ محمد شبیر اعوان کی حمایت کا اعلان، سابق ڈی جی آئی ایس آئی نے PTI امیدوار کی حمایت میں کہوٹہ مٹور میں اپنی رہائش گاہ پر انتخابی جلسے کا بھی اہتمام کیا۔ pic.twitter.com/xWK8hIweYG
— Shabbir Dar (@dar_shabbir) June 26, 2022
دوسری جانب فواد چودھری نے سابق لیفٹیننٹ ظہیر الاسلام کی تحریک انصاف میں شمولیت کی خبروں کی سختی سے تردید کرتے ہوئے کہا ہے کہ انہوں نے ضمنی الیکشن میں ہمارے امیدوار کی حمایت کرتے ہوئے صرف ایک سیاسی اجتماع میں شرکت کی ہے۔
فواد چودھری کا کہنا تھا کہ کہ جنرل (ر) ظہیر الاسلام کی پی ٹی آئی میں شمولیت کی خبروں میں کوئی صداقت نہیں ہے۔ ان کی حمایت صرف ہمارے امیدوار کیساتھ ہے جو ان کے رشتہ دار بھی ہیں۔
