پاکستان کرکٹ ٹیم کے مایہ ناز لیگ سپنر عبدالقادر کے بیٹے سلیمان قادر نے انکشاف کیا ہے کہ والد کی وفات کے ساڑھے تین سال بعد عمران خان کی جانب سے انہیں پیغام بھیجا گیا ہے کہ وہ ان کے والد کی وفات پر تعزیت کرنا چاہتے ہیں لہٰذا وہ زمان پارک میں عمران خان کے گھر آ جائیں۔ ایک ویڈیو پیغام میں سلیمان قادر نے بتایا کہ عمران خان کے بلاوے پر انہوں نے زمان پارک جانے سے معذرت کر لی۔
ان کا مزید کہنا تھا کہ کسی کی وفات پر اس کے گھر جا کر تعزیت کرنا روایت ہے اسی لئے عمران خان کا اپنے گھر بلانا خاصا معیوب لگا۔ ان کی والدہ نے اس بلاوے کو مناسب نہیں سمجھا، لہٰذا انہوں نے زمان پارک جانے سے انکار کر دیا۔
واضح رہے کہ عمران خان کے بارے میں بہت سارے لوگوں کا کہنا ہے کہ وہ جنازوں میں شرکت نہیں کرتے اور تعزیت کے لئے بھی کسی کے گھر نہیں جاتے۔ اس سے پہلے وہ اپنے قریبی دوست اور پی ٹی آئی کے رہنما نعیم الحق کی تعزیت کے لئے بھی نہیں گئے تھے۔ اسی طرح عمران خان ارشد شریف کے جنازے میں بھی نہیں شامل ہوئے تھے۔ ذرائع بتاتے ہیں کہ عمران خان کی ان غیر حاضریوں کے پیچھے ان کی اہلیہ بشریٰ بی بی کی ہدایات کارفرما ہیں۔
