اسلام آباد: وزیردفاع خواجہ آصف نے الیکشن نوے کے بجائے نو دن میں کرانے کی خواہش کا اظہار کرتے ہوئے کہا ہے کہ موجودہ صورتحال میں الیکشن کا انعقاد صاف و شفاف نہیں ہو سکے گا۔
وزیردفاع نے سپریم کورٹ کے صوبائی انتخابات ازخود نوٹس کیس کے فیصلے پر ردعمل دیتے ہوئے کہا کہ الیکشن سے متعلق کیسز دو عدالتوں میں زیر سماعت ہیں،سپریم کورٹ کے فیصلے سے کیسز پر اثرپڑے گا، بہتر ہوتا کہ زیر سماعت کیسز کا فیصلہ آنے کے بعد ہی سپریم کورٹ اپنی کوئی رائے پیش کرتا۔
انھوں نے کہا کہ میری خواہش ہے کہ الیکشن نوے کے بجائے نو دن میں ہو جائیں لیکن موجودہ صورتحال میں الیکشن کا انعقاد صاف و شفاف نہیں ہو سکے گا، انتخابی عمل متنازعہ ہوگا اور ایسے پروسس کا کیا فائدہ جو آگے جا کر متنازع ہو۔
