راولپنڈی: افواج پاکستان، چیئرمین جوائنٹ چیفس آف اسٹاف کمیٹی اور سروسز چیفس کی جانب سے حوالدار لالک جان شہید، نشان حیدر کے 24ویں یوم شہادت کے موقع پر زبردست خراج عقیدت پیش کیا گیا۔
پاک فوج کے شعبہ تعلقات عامہ کے مطابق حوالدار لالک جان نے بہادری سے لڑتے ہوئے مادر وطن کے لیے اپنی جان کا نذرانہ پیش کیا۔ ان کی ثابت قدمی، فرض سے لگن اور بے مثال جرات جیسی صفات افواج پاکستان کا طرہ امتیاز رہا ہے۔ پاکستانی قوم اپنے بہادر سپوتوں کی لازوال قربانیوں پہ ہمیشہ ان کی مقروض رہے گی۔
پاکستان کے یہ درخشندہ ستارے جنہوں نے ملک کی آبرو کے لیے اپنی جان نچھاور کی بِلاشُبہ عزت و تکریم کے مستحق ہیں۔ وطن کی خاطر دی جانے والی یہ قربانیاں ہمارے لیے اور ہماری آنے والی نسلوں کے لیے مشعل راہ ہیں۔
