لاہور: کاہنہ میں اغوا برائے تاوان کا ڈراپ سین ہوگیا، مغوی خود ہی اغوا کار نکلا۔
ایکسپریس نیوز کے مطابق لاہور کے تھانہ کاہنہ میں اصغر علی ولد رحمت علی نے شکایت درج کرائی تھی کہ اسکے بھائی 35 سالہ اللہ دتہ ولد رحمت علی کو نامعلوم ملزمان نے اغوا کرلیا ہے جس پر ایس پی ماڈل ٹاؤن عمارہ شیرازی نے چوکی انچارج ذوالفقار علی کی سربراہی میں ٹیم تشکیل دی تھی۔
ایس پی ماڈل ٹاؤن عمارہ شیرازی کے مطابق پولیس نے جدید ٹیکنالوجی کی مدد سے اغوا کار کی لوکیشن کو ٹریس کیا۔ پولیس کے پہنچنے پر پتہ چلا مغوی خود ہی معاملے کا ماسٹر مائنڈ ہے۔
انہوں نے بتایا کہ ملزم نے ایک روز قبل اپنے بھائی اصغر کی مدعیت میں اپنے اغوا کا جھوٹا مقدمہ درج کروایا تھا اور اپنے دو ساتھیوں سے مل کر اپنے گھر والوں سے 3 لاکھ روپے تاوان کا مطالبہ کیا تھا۔
ایس ایس پی عمارہ شیرازی کے مطابق ملزمان میں مرکزی ملزم اللہ دتہ، آصف اور نبیل شامل ہیں۔ ملزمان سے 3 لاکھ تاوان کی رقم بھی برآمد کر لی گئی ہے۔ ایس پی عمارہ شیرازی نے کیس حل کرنے پر پولیس ٹیم کو شاباشی دیتے ہوئے تعریفی اسناد دینے کا بھی اعلان کیا ہے۔
