اسلام آباد: اسلام آباد ہائی کورٹ میں توشہ خانہ کیس کی سماعت کے بعد چیئرمین پی ٹی آئی کے وکیل لطیف کھوسہ اور دیگر افراد لفٹ میں پھنسے رہے جہاں ان کی حالت غیر ہوگئی، انتظامیہ نے 45 منٹ بعد انہیں نکالا۔
میڈیا رپورٹس کے مطابق اسلام آباد ہائی کورٹ کی لفٹ میں وکلا کے پھنسنے کی فوٹیجز سامنے آگئیں، فوٹیج میں دیکھا جاسکتا ہے سردار لطیف کھوسہ موجود ہیں، لفٹ میں بجلی بند ہے اور وکلا نے موبائل فونز کی لائٹس آن کی ہوئی ہیں۔
لطیف کھوسہ ایڈووکیٹ سمیت دیگر وکلا 45 منٹ سے زائد وقت تک لفٹ میں پھنسے رہے، ان کے ساتھ موجود نعیم حیدر پنجوتھا، علی اعجاز بٹر سمیت پندرہ افراد کو بحفاظت باہر نکالا گیا۔
کھوسہ صاحب آپ جوان نہیں بلکہ ماشاءاللہ نوجوان ہیں ۔۔ ۔اپ کی ہمت نے اپ کا نام سنہری حروف سے تاریخ میں لکھ دیا ہے ۔۔۔ شاید اپ کو دیکھ کر کچھ لوگوں کو غیرت آجائے #لطیف_کھوسہ_ہیرو #عمران_خان_سرخرو pic.twitter.com/Vddi7IIqSc
— Shehr Bano Official (@OfficialShehr) August 25, 2023
تمام افراد چیف جسٹس کی کورٹ سے نکل کر تھرڈ فلور پر لفٹ میں سوار ہوئے تھے اور لفٹ گرائونڈ فلور پر آنے کے دوران سیکنڈ فلور پر پھنس گئی تھی۔بارہ بجے لفٹ میں سوار ہونے والے 10 سے زائد وکلا کو 12:45 پر لفٹ سے نکالا گیا۔
واضح رہے کہ اسلام آباد ہائی کورٹ تین ماہ قبل نئی عمارت میں منتقل ہوئی ہے، تین ماہ بعد ہی لفٹ خراب ہوگئی تاحال لفٹ کا کوئی عملہ تعینات نہیں ہوا۔ لفٹ میں ایمرجنسی رابطہ کی سہولت اور ایگزاسٹ بھی نہیں ۔
