اسلام آباد: سعودی ولی عہد محمد بن سلمان جی 20 سربراہ اجلاس میں شرکت کے لیے بھارت نہیں جائیں گے۔
میڈیا رپورٹس کے مطابق جی 20 سربراہی اجلاس نئی دہلی میں 9 اور 10 ستمبرکو منعقد ہوگا، سعودی ولی عہد محمد بن سلمان کا 10 ستمبر کو دورہ پاکستان متوقع تھا، پاکستان میں قیام کے بعد انہوں نے جی 20 سربراہ اجلاس میں شرکت کے لیے نئی دہلی روانہ ہونا تھا۔
ذرائع کے مطابق سعودی ولی عہد محمد بن سلمان کا دورہ پاکستان موخر ہو گیا ہے اب وہ جی 20 سربراہ اجلاس میں شرکت کے لیے بھارت بھی نہیں جائیں گے۔
دفتر خارجہ کی ترجمان ممتاز زہرا بلوچ نے نے ایک مختصر بیان میں اس بات کی تصدیق کی کہ سعودی ولی عہد محمد بن سلمان کے دورہ پاکستان کو ری شیڈول کیا جا رہا ہے اور نئی تاریخیں دونوں فریق باہمی طور پر طے کریں گے۔
خیال رہے کہ سعودی ولی عہد نے آخری بار فروری 2019 میں پاکستان کا دورہ کیا تھا اور اس وقت کے وزیراعظم عمران خان نے ان کی میزبانی کی تھی۔
