اسلام آباد: شوال المکرم کا چاند دیکھنے کے لیے مرکزی رویت ہلال کمیٹی کا اجلاس منگل کو اسلام آباد میں ہوگا۔
کمیٹی کے چیئرمین مولانا عبدالخبیر آزاد اجلاس کی صدارت کریں گے۔
اجلاس میں وزارت سائنس و ٹیکنالوجی، پاکستان میٹرولوجیکل ڈیپارٹمنٹ اور دی اسپیس اینڈ اپر ایٹموسفیئر ریسرچ کمیشن سمیت مختلف اداروں کے اراکین بھی شرکت کریں گے۔
اسلام آباد، لاہور، کراچی، کوئٹہ اور پشاور کے زونل ممبران بھی بحث میں حصہ لیں گے۔
عوامی شمولیت کی اہمیت پر زور دیتے ہوئے مولانا آزاد نے شہریوں کی حوصلہ افزائی کی ہے کہ وہ شوال المکرم کے چاند دیکھنے کی کوششوں میں بڑھ چڑھ کر حصہ لیں۔
واضح رہے کہ پی ایم ڈی نے پیش گوئی کی تھی کہ پاکستان میں شوال کا چاند 9 اپریل کو ملک بھر میں نظر آنے کا امکان ہے۔
پی ایم ڈی کے مطابق شوال کے چاند کی پیدائش 8 اپریل کی رات مقامی وقت کے مطابق 11 بج کر 21 منٹ پر نمودار ہونے کا امکان ہے۔
9 اپریل کو چاند کی عمر 19 سے 20 گھنٹے ہوگی۔ محکمہ موسمیات نے کہا کہ غروب آفتاب کے بعد تقریباً 50 منٹ تک یہ ننگی آنکھوں سے نظر آئے گا۔
پی ایم ڈی نے کہا کہ اگر 9 اپریل کو چاند نظر آگیا تو عید الفطر 10 اپریل بروز بدھ کو منائی جائے گی۔
دریں اثنا، وفاقی حکومت نے رمضان المبارک کے مقدس مہینے کے اختتام پر عیدالفطر کے موقع پر پانچ روزہ تعطیلات کا اعلان کیا ہے۔
