کراچی :خاتون کار ڈرائیور کے موٹروے اہلکار کو روندنے کی ویڈیو وائرل ہونے کے معاملے میں پیش رفت نہ ہوسکی، موٹروے پولیس واقعے میں ملوث خاتون کو ڈھونڈنے میں ناکام ہو گئی ہے۔
ترجمان موٹروے پولیس کا کہنا ہے کہ سوشل میڈیا پر گردش ویڈیو یکم جنوری کی ہے خاتون ڈرائیور کیخلاف متعلقہ تھانے میں ایف آئی آر درج کروا دی تھی، قانون کی خلاف ورزی کرنے والوں کیخلاف کوئی رعایت نہیں برتی جائے گی تاہم اس کیس میں اب تک کسی قسم کی قانونی کارروائی نہیں کی گئی۔
واضح رہے کہ سوشل میڈیا پر خاتون ڈرائیور کی ویڈیو وائرل ہوئی تھی جس میں دیکھا جاسکتا ہے کہ ٹول پلازہ پر ڈرائیور موٹروے پولیس اہلکار کو روندتے ہوئے گاڑی بھگا کر لے گئی تھیں، ویڈیو سامنے آنے پر شہریوں نے ڈرائیور کے اس غیرمہذب اقدام پر سخت غم و غصے کا اظہار کیا تھا۔
