بلوچستان کے ضلع واشک میں مسافر بس گہری کھائی میں گر جانے سے 28 افراد جاں بحق ہوگئے۔
بلوچستان کے ضلع واشک کے علاقے کلغلی میں مسافر کوچ کو حادثہ ٹائر پھٹنے کی وجہ سے پیش آیا، بس گوادر سے کوئٹہ جارہی تھی کہ ٹائر پھٹنے سے بس بے قابو ہوگئی اور کھائی میں جاگری جس کے نتیجے میں خواتین اور بچوں سمیت 28 افراد جاں بحق اور کئی دیگر زخمی ہو گئے۔
مسافر کوچ رات کو تربت سے روانہ ہوئی تھی اور صبح 4 بجے کے قریب حادثہ پیش آیا، حادثے کی اطلاع ملتے ہی ریسکیو ٹیمیں جائے حادثہ پر پہنچیں اور امدادی کارروائیاں شروع کی گئیں، لاشوں و زخمیوں کو نکال کر سول اسپتال بسیمہ منتقل کیا گیا۔
لیویز حکام کے مطابق حادثے میں 22 افراد زخمی بھی ہوئے ہیں جن میں کئی کی حالت تشویشناک ہے جس کے باعث ہلاکتوں میں مزید اضافے کا خدشہ ہے، زخمیوں کو مزید علاج کے لیے کوئٹہ منتقل کیا جا رہا ہے۔
