اسلام آباد: وزیرمنصوبہ بندی احسن اقبال نے کہا کہ ایک جماعت ذاتی مفاد کیلئے اداروں کے خلاف مہم چلارہی ہے۔
احسن اقبال کا کہنا تھا کہ سیاست کیلئے ریاست کو داؤ پر نہیں لگانا چاہئے، تنقید کرنے والوں کو ٹرولنگ کے ذریعے ہراساں کیا جاتا ہے، ہم حکومت اور اپوزیشن میں رہے کبھی ریاستی اداروں کو تنقید کانشانہ نہیں بنایا۔
ان کا کہنا تھا کہ ایک سیاسی جماعت نے ریاستی مفاد کو قربان کرنے کی کوشش کی، پگڑیاں اچھالنے کیلئے ٹرولنگ کی طرز سیاست جمہوری نہیں، ایک سیاسی جماعت سیاستدانوں، کبھی اداروں کیخلاف ٹرولنگ کرتی ہے۔
وفاقی وزیر کا کہنا تھا کہ مخالفین کو دباؤ میں لانے کیلئے ٹرولنگ شروع کی جاتی ہے، سیاست اور ریاست میں فرق سمجھنا چاہئے، ہماری سیاست میں اتار چڑھاؤ ہوسکتا ہے لیکن ریاست میں نہیں، ریاست کو ہمیشہ سیاسی مفاد سے بلند رہنا چاہئے۔
ان کا کہنا تھا کہ ہم سی پیک کے اپ گریڈڈ ورژن کے ساتھ آگے بڑھ رہے ہیں، ریاست کے مفادات کے ساتھ کھیلنے والوں سے آہنی ہاتھوں سے نمٹاجائے گا۔
