اسلام آباد:پی ٹی آئی رہنما اور قومی اسمبلی میں اپوزیشن لیڈر عمر ایوب نے دعویٰ کیا ہے کہ ان کا بیرسٹر گوہر سے رابطہ منقطع ہوا جب کہ ان کے 7 ارکان کو اغوا کرلیا گیاہے۔
نجی ٹی وی کی رپورٹ کے مطابق پارلیمنٹ ہاؤس پہنچنے کے موقع پر میڈیا کے نمائندوں سے بات کرتے ہوئے عمر ایوب نے کہا کہ میری پارٹی چیئرمین بیرسٹر گوہر سے فون پر گفتگو ہو رہی تھی کہ رابطہ منقطع ہوگیا اور اس کے بعد بات نہیں ہو سکی۔ ہم اس سلسلے میں ساتھیوں سے مشورہ کررہے ہیں۔
انہوں نے کہا کہ ہم دیکھ رہے ہیں کہ حکومت اس موقع پر کیا کچھ کرے گی۔ عمر ایوب نے بتایا کہ ہمارے 7 ارکان کو اغوا کیا گیا ہے اور ہم سب کے خلاف مقدمات قائم کردیے گئے ہیں۔
آئینی ترمیم سے متعلق بات کرتے ہوئے انہوں نے کہا کہ ساتھیوں کے ساتھ مشاورت کا سلسلہ جاری ہے، ہم نے فیصلہ کیا ہے کہ جمعیت علمائے اسلام کے ساتھ انگیج رہیں گے۔ مشاورت کے لیے اپنے ساتھیوں سے رابطے کررہے ہیں جب کہ جے یو آئی کے ساتھ بات چیت بھی جاری رکھنی ہے۔
