کوئٹہ (نمائندہ جسارت) بلوچستان حکومت نے صوبے میں بے نظیر کسان کارڈ متعارف کرانے کا فیصلہ کرلیا۔ بلوچستان حکومت کے ترجمان شاہد رند کا کہنا ہے کہ حکومت بلوچستان نے زراعت کی ترقی اور کسانوں کی بہبود کے لیے اہم تاریخی اقدام کرتے ہوئے صوبے میں بے نظیر کسان کارڈ متعارف کرانے کا فیصلہ کیا ہے۔ کسان کارڈ کے تحت بلوچستان کے چھوٹے زمینداروں کو سبسڈی دی جائے گی، وزیر اعلیٰ بلوچستان میر سرفراز بگٹی نے محکمہ زراعت کی سمری پر کسان کارڈ کی منظوری دے دی ہے۔ ترجمان کا کہنا ہے کہ کسان کارڈ کے لیے محکمہ انفارمیشن ٹیکنالوجی 2 سال کے لیے کلاؤڈ سسٹم قائم کرے گی۔
