محکمہ داخلہ پنجاب نے صوبے بھر میں امن و امان کی صورتحال کو مدنظر رکھتے ہوئے آئندہ 10 روز کے لیے دفعہ 144 نافذ کر دی ہے، جس کے تحت اسلحے کی نمائش، عوامی اجتماعات، جلسے، جلوس اور دھرنوں پر پابندی عائد کر دی گئی ہے۔
جاری کردہ نوٹیفکیشن کے مطابق، صوبے میں کسی بھی قسم کے ہتھیار کی نمائش اور عوامی سطح پر اجتماع کی اجازت نہیں ہوگی۔ اس کے علاوہ، اذان اور خطبہ کے علاوہ لاؤڈ اسپیکر کے استعمال پر بھی مکمل پابندی لگا دی گئی ہے۔
واضح رہے کہ تحریک لبیک پاکستان (TLP) نے آج اسلام آباد کی جانب مارچ کا اعلان کیا ہے، جبکہ گزشتہ روز لاہور سمیت پنجاب کے مختلف شہروں میں ٹی ایل پی کارکنوں اور پولیس کے درمیان جھڑپوں کے واقعات پیش آئے تھے۔
