پشاور: لکی مروت اور بنوں میں الگ الگ فائرنگ کے واقعات میں چار پولیس اہلکار شہید ہوگئے۔
لکی مروت پولیس کے مطابق سرائے نورنگ شہر میں نامعلوم موٹر سائیکل سوار دہشتگردوں نے ڈیوٹی پر مامور تین ٹریفک پولیس اہلکاروں پر فائرنگ کی، جس کے نتیجے میں انچارج نورنگ جلال خان، کانسٹیبل عزیز اللہ اور کانسٹیبل عبداللہ شہید ہوگئے۔ دہشتگرد فائرنگ کے بعد فرار ہوگئے اور شہید اہلکاروں کی لاشیں تحصیل ہیڈ کوارٹر اسپتال سرائے نورنگ منتقل کر دی گئی ہیں۔
دوسری جانب بنوں میں منڈان کے علاقے میں بھی نامعلوم افراد کی فائرنگ سے پولیس اہلکار کانسٹیبل رشید خان شہید ہوگئے، پولیس کے مطابق وہ گھر سے تھانہ منڈان ڈیوٹی کے لیے جا رہے تھے کہ مسلح افراد نے ان پر فائرنگ کی۔
پولیس نے دونوں علاقوں میں تحقیقات شروع کر دی ہیں اور ملزمان کی تلاش کے لیے سرچ آپریشن جاری ہے۔
