اقوامِ متحدہ میں پاکستان کے مستقل مندوب عاصم افتخار نے یوکرین بحران کے حل کے لیے مذاکرات کو واحد مؤثر راستہ قرار دے دیا۔
سلامتی کونسل سے خطاب کرتے ہوئے انہوں نے کہا کہ یوکرین کے معاملے پر پائیدار اور دیرپا امن کے قیام کے لیے مکالمے اور سفارتی عمل کی بالادستی ناگزیر ہے۔
عاصم افتخار کا کہنا تھا کہ پاکستان اصولی طور پر تنازعات کے پرامن حل کا حامی ہے اور یہی مؤقف یوکرین مسئلے پر بھی اختیار کیا گیا ہے۔ انہوں نے واضح کیا کہ طاقت کے استعمال کے بجائے بات چیت ہی ایسا راستہ ہے جو دیرپا امن کی بنیاد رکھ سکتا ہے۔
پاکستانی مندوب نے امریکا سمیت متعدد ممالک کی سفارتی کوششوں کو سراہتے ہوئے امید ظاہر کی کہ فریقین جاری مذاکراتی عمل سے بھرپور فائدہ اٹھائیں گے۔ ان کے مطابق یہ کوششیں ایک ایسے منصفانہ اور پائیدار تصفیے کی طرف لے جا سکتی ہیں جو تمام متعلقہ فریقوں کے لیے قابلِ قبول ہو۔
انہوں نے مزید کہا کہ امید ہے یہ سفارتی کاوشیں یوکرین اور روس دونوں کے سلامتی مفادات سے ہم آہنگ ہوں گی اور یورپ میں امن و استحکام کے قیام میں معاون ثابت ہوں گی۔
