لاہور: گرین ٹاؤن کے علاقے میں کئی ماہ سے پالتو جانوروں کی راتوں رات ہلاکت اور غائب ہونے کے واقعات کے راز فاش ہو گئے۔
پولیس کے مطابق سی سی ٹی وی فوٹیج نے یہ بھانڈہ پھوڑا کہ جانوروں کے چارے میں زہریلا مواد ڈال کر ان کی موت واقع کی جا رہی تھی،مقامی افراد نے خاکروب شاہد کو واردات کے دوران پکڑ کر درگت بنایا، جس پر ملزم نے جرم کا اعتراف کرتے ہوئے بتایا کہ وہ اپنے ساتھی راشد کے ساتھ مل کر یہ کارروائی کرتا تھا۔
پولیس کے مطابق ملزمان مردہ جانوروں کا گوشت مختلف ہوٹلوں میں فروخت کرتے تھے۔ دونوں کے خلاف 8 مقدمات درج کر لیے گئے ہیں اور فوڈ اتھارٹی کو بھی متعلقہ ہوٹلوں کے خلاف کارروائی کی ہدایت دی گئی ہے۔
اہل علاقہ نے بتایا کہ گزشتہ چند ماہ میں تقریباً 30 سے 40 پالتو جانور ہلاک ہو چکے ہیں اور ملزمان کے خلاف سخت قانونی کارروائی کی جائے۔ پولیس نے عوام سے اپیل کی ہے کہ کسی بھی مشکوک سرگرمی کی اطلاع فوری دیں تاکہ ایسے واقعات کو روکا جا سکے۔
