صومالیہ اور پاکستان کے درمیان 24 جدید لڑاکا طیاروں کی خریداری کے حوالے سے بات چیت میں اہم پیشرفت سامنے آئی ہے۔
ذرائع کے مطابق صومالیہ پاکستان سے جے ایف-17 تھنڈر طیارے خریدنے کے لیے اعلیٰ سطح پر مذاکرات کر رہا ہے، مجوزہ معاہدے کے تحت صومالیہ تقریباً 24 جے ایف-17 تھنڈر طیاروں کی خریداری پر غور کر رہا ہے، جس کی مالیت تقریباً دو کھرب اکاون ارب روپے (نو سو ملین ڈالر) بتائی جا رہی ہے۔ مذاکرات میں خاص طور پر جے ایف-17 کے جدید بلاک تھری ورژن پر توجہ مرکوز کی گئی ہے۔
اطلاعات کے مطابق سعودی عرب اور ترکی ممکنہ طور پر اس معاہدے کی مالی معاونت فراہم کر سکتے ہیں۔ پاکستان اس سے قبل میانمار، نائجیریا اور آذربائیجان کو جے ایف-17 طیارے فراہم کر چکا ہے، جبکہ بنگلادیش اور عراق نے بھی دلچسپی ظاہر کی ہے۔
