کینیڈا کے وزیراعظم مارک کارنی نے دفاعی پالیسی میں بڑی تبدیلی کا عندیہ دیتے ہوئے امریکا پر انحصار کم کرنے اور مقامی فوجی سرمایہ کاری بڑھانے کے عزم کا اظہار کیا ہے۔
کینیڈین میڈیا کے مطابق مونٹریال میں لبرل پارٹی کے قومی کنونشن سے خطاب کرتے ہوئے انہوں نے قومی خودمختاری اور دفاعی خود انحصاری کو اپنی حکمت عملی کا اہم ستون قرار دیا۔
مارک کارنی نے کہا کہ وہ دور گزر چکا جب کینیڈا کے دفاعی اخراجات کا بڑا حصہ امریکا پر خرچ ہوتا تھا۔
ان کا کہنا تھا کہ بدلتی ہوئی عالمی صورتحال کے پیش نظر کینیڈا اب پرانے اتحادوں پر مکمل انحصار نہیں کر سکتا، اس لیے دفاعی معاملات میں خود کفالت کو فروغ دیا جائے گا اور مقامی سطح پر سرمایہ کاری میں اضافہ کیا جائے گا۔
