امریکا میں طوفانی بگولوں سے تباہی میں اضافہ ،ہلاکتیں33 ہوگئیں

واشنگٹن (انٹرنیشنل ڈیسک) امریکا کی جنوبی ریاستوں میں طوفانی بگولوں سے ہلاکتوں کی تعداد 33ہوگئی۔ خبررساں اداروں کے مطابق ہوا کے تیز جھکڑوں نے بڑے پیمانے پر تباہی مچائی، جس کے نتیجے میں درجنوں گھر مکمل طور پر تباہ ہوگئے۔ امریکی ریاستوں مسیسپی ، جارجیا اور کیرولائنا میں خراب موسم نے معمولات زندگی معطل کردیے اور بڑے پیمانے پر نقصان ہوا ۔ ریاست مسیسپی میں 15، جارجیا میں 8 اور کیرولائنا میں 6 ہلاکتیں ہوئیں ، جب کہ دیگر ریاستوں میں بھی 2 افراد ہلاک ہوئے۔ زیادہ تر ہلاکتیں گھروں کے ملبے تلے دبے ہونے کی وجہ سے ہوئیں جب کہ کچھ ہلاکتیں درختوں اور سائن بورڈ گرنے سے ہوئیں۔