ترانا (انٹرنیشنل ڈیسک) البانوی وزیر اعظم ایدی راما نے کہا ہے کہ یورپی یونین کا رکن نہ بننے کی صورت میں کوسوو سے الحاق ہوسکتا ہے۔ ایدی راما نے جرمن میڈیا سے گفتگو کرتے ہوئے یورپی یونین اور مغربی بلقان کی پالیسیوں سے متعلق سوالوں کے جواب دیے۔ کوسوو سے ممکنہ الحاق کے بارے میں ایدی راما نے کہا کہ اگر ہم یورپی یونین کے رکن نہ بنے تو اس بات کا قوی امکان ہے۔ یاد رہے کہ بلقانی علاقے میں سرحدوں میں ردو بدل کے موضوع پر سلووینیا کے وزیراعظم یانز یانشا کی جانب سے تیار کردہ ایک خفیہ دستاویز کا انکشاف کیا گیا تھا۔ اس دستاویز میں دکھایا گیا تھا کہ شمالی مقدونیاکا ایک حصہ اور کوسوو البانیہ میں ضم ہو جائیں گے۔ یورپی کمیشن نے اسے جھوٹا قرار دیا تھا۔