تروواننتاپورم (انٹرنیشنل ڈیسک) بھارتی ریاست کیرالا میں 12 گھنٹوں کے دوران 2 سیاسی رہنماؤں کو قتل کردیا گیا۔بھارتی میڈیا کے مطابق بی جے پی رہنما رنجیت سری نواسن کو ان کی رہایش گاہ پر قتل کیا گیا، اس سے پہلے ایس ڈی پی آئی کے رہنما کے ایس شان کو قتل کیا گیا تھا۔بھارتی میڈیا کے مطابق ایس شان کے قتل کا الزام ان کی پارٹی نے انتہا پسند تنظیم آر ایس ایس پر عائد کیا ہے ، جب کہ پولیس نے امکان ظاہر کیا ہے کہ بی جے پی رہنما کا قتل ایس ڈی پی آئی لیڈر کے قتل کا بدلہ ہو سکتا ہے۔ بھارتی ذرائع ابلاغ کے مطابق پولیس نے مقتول رنجیت کے گھر کی فوٹیچ حاصل کرکے انتہاپسند ہندو تنظیم راشٹریہ سیوک سنگھ کے 2 کارندوں کو گرفتارکرلیا ہے۔ دوسری جانب بھارت میں انتہا پسند ہندوؤں کے ہاتھوں ایک اور بے گناہ مسلمان نوجوان کو بے دردی سے قتل کردیا گیا۔ واقعے کی وڈیو نے علاقے میں آباد مسلمانوں میں خوف و ہراس پھیلا دیا۔ بھارتی میڈیا کی رپورٹ کے مطابق ریاست ہریانہ کے ضلع پلوال کے رسول پور گاؤں میں ہجوم کے ہاتھوں مسلمان نوجوان کے بہیمانہ قتل کا واقعہ پیش آیا ، جس میں مقتول نوجوان کے دوست ملوث تھے۔