مانانوالہ (آن لائن) سابق وفاقی وزیر و مسلم لیگ ن کے سینئر رہنما چیئرمین پبلک اکاؤنٹس کمیٹی رانا تنویر حسین نے کہا ہے کہ تبدیلی کا ٹائی ٹینک ڈوب چکا ہے، مہنگائی نے عوام کے اعصاب شل کر دیے ہیں خطے میں پاکستان مہنگائی کے حوالے سے سرفہرست آ چکا ہے مگر اقتدار کے نشے میں بدمست تبدیلی سرکار اور حواری ٹولہ اب بھی پاکستان کو دنیا کا سستا ترین ملک قرار دے رہے ہیں جو مہنگائی میں پسی ہوئی عوام کے زخموں پر نمک چھڑکنے کے مترادف ہے۔ میڈیا سے گفتگو کرتے ہوئے رانا تنویر حسین نے کہا کہ میاں نواز شریف کے نام پر نااہل حکومت سیاست کر رہی ہے جن کے پاس اور کچھ نہیں ہے، نااہل کپتان کے تمام کھلاڑی آپنے کپتان سمیت پویلین واپس لوٹ گئے ہیں جن کا کوئی سیاسی مستقبل نہیں ہے اب یہ کرائے کے ترجمان اڑان بھرنے کے لیے مصروف عمل ہیں ایسے ابن الوقت سیاستدانوں کا عوام میں کوئی ٹھکانہ نہیں ہے ۔