واشنگٹن (انٹرنیشنل ڈیسک) امریکی شہر نیواورلینز میں ڈرائیور نے گاڑی ہجوم پر چڑھادی جس کے نتیجے میں 10 افراد ہلاک اور 30 زخمی ہوگئے۔ امریکی میڈیا نے عینی شاہدین کے حوالے سے بتایا کہ ڈرائیور نے گاڑی ہجوم پر چڑھانے کے بعد گاڑی سے اتر کر فائرنگ بھی کی جس کے بعد پولیس کی جانب سے بھی جوابی فائرنگ کی گئی۔ جس مقام پر واقعہ پیش آیا وہاں لوگ سال نو کا جشن منانے کے لیے جمع تھے۔ سوشل میڈیا پر گردش کرنے والی وڈیو میں جائے وقوع پر زخمی اور ہلاک افراد کو دیکھا جاسکتا ہے جبکہ ایک وڈیو میں پولیس کو گاڑی پر فائرنگ کرتے ہوئے بھی دیکھا جاسکتا ہے۔