سکیورٹی خدشات کے پیشِ نظر آج بلوچستان بھر میں ٹرین سروس مکمل طور پر معطل رہے گی۔ ریلوے حکام کے مطابق یہ فیصلہ ناگزیر وجوہات کی بنیاد پر کیا گیا ہے تاکہ مسافروں کی جان و مال کو محفوظ رکھا جا سکے۔
ریلوے حکام کا کہنا ہے کہ پشاور کے لیے جانے والی جعفر ایکسپریس، کراچی کے لیے بولان میل اور پشاور سے کوئٹہ آنے والی جعفر ایکسپریس کو آج کے لیے منسوخ کر دیا گیا ہے۔ اس فیصلے سے طویل فاصلے کے مسافروں کو مشکلات کا سامنا کرنا پڑ سکتا ہے۔
اس کے علاوہ کوئٹہ سے چمن کے درمیان چلنے والی چمن ٹرین بھی آج معطل رہے گی۔ حکام کے مطابق صورتحال کا مسلسل جائزہ لیا جا رہا ہے اور سکیورٹی کلیئر ہونے کے بعد ٹرین سروس کی بحالی سے متعلق فیصلہ کیا جائے گا۔
ریلوے انتظامیہ نے مسافروں کو سفر سے قبل متعلقہ اسٹیشنز اور ہیلپ لائنز سے معلومات حاصل کرنے کا مشورہ دیا ہے۔