سپریم کورٹ کے نئے چیف جسٹس یحییٰ آفریدی نے چیف جسٹس آف پاکستان کے عہدے کا حلف اٹھا لیا۔
نئے چیف جسٹس آف پاکستان جسٹس یحییٰ آفریدی نے پاکستان کے 30 ویں چیف جسٹس کے عہدے کا حلف اٹھالیا، صدر مملکت آصف علی زرداری نے ایوانِ صدر میں ان سے حلف لیا۔
چیف جسٹس پاکستان کی تقریب حلف برداری ایوان صدر میں ہوئی، تقریبِ حلف برداری میں وزیرِ اعظم شہباز شریف ،مسلح افواج کے سربراہان، اسپیکر قومی اسمبلی، وزیراعلیٰ پنجاب مریم نواز، وزیراعلیٰ بلوچستان سرفراز بگٹی ،وزیراعلیٰ خیبرپختونخوا علی امین گنڈاپور، گورنرخیبرپختونخوا فیصل کریم، گورنر پنجاب سلیم حیدر، اٹارنی جنرل منصور عثمان اعوان ،چیئرمین سینیٹ یوسف رضا گیلانی اور وفاقی وزرا نے شریک کی۔
جسٹس یحییٰ آفریدی کی تقریب حلف برداری میں سپریم کورٹ کے موجودہ اور سابق ججز نے بھی شرکت کی،تقریب میں جسٹس اطہر من اللّٰہ، جسٹس منیب اختر ،جسٹس عائشہ ملک نے بھی شرکت کی۔
واضح رہے کہ 26 ویں آئینی ترمیم کے نفاذ کے بعد پارلیمنٹ کی خصوصی کمیٹی نے جسٹس یحییٰ آفریدی کو چیف جسٹس کیلئے نامزد کیا تھا۔
