پشاور:
پشاور ہائیکورٹ میں پی ٹی آئی رہنما عمر ایوب کے خلاف اثاثہ جات سے متعلق الیکشن کمیشن آف پاکستان کے نوٹس کے خلاف دائر درخواست پر سماعت مکمل کرلی گئی، عدالت نے فیصلہ محفوظ کرلیا۔
سماعت دو رکنی بینچ نے کی، جس میں جسٹس سید ارشد علی اور جسٹس فرح جمشید شامل تھے۔ درخواست گزار کے وکیل، الیکشن کمیشن کے ڈپٹی ڈائریکٹر لا اور دیگر وکلا عدالت میں پیش ہوئے۔
درخواست گزار کے وکیل نے مؤقف اختیار کیا کہ اسپیکر کی جانب سے عمر ایوب کے خلاف الیکشن کمیشن کو بھیجا گیا ریفرنس غیر قانونی تھا اور قانونی تقاضے پورے کیے بغیر ارسال کیا گیا۔ وکیل کے مطابق الیکشن کمیشن نے بھی اسی روز اثاثہ جات سے متعلق نوٹس جاری کر دیا۔
وکیل نے مزید بتایا کہ ابتدائی سماعت میں عدالت نے الیکشن کمیشن کے نوٹس کو معطل کر دیا تھا۔
عدالت نے فریقین کے دلائل سننے کے بعد ریمارکس دیے کہ اس معاملے پر مناسب حکم جاری کیا جائے گا، اور بعد ازاں فیصلہ محفوظ کرلیا گیا۔
