سری نگر/جموں و کشمیر پولیس کے ڈائریکٹر جنرل آف پولیس (ڈی جی پی) نلین پربھات نے جموں و کشمیر پولیس (گزیٹڈ) سروسز کے لیے حال ہی میں منتخب امیدواروں کو مبارکباد دیتے ہوئے کہا کہ پولیس کی وردی پہننا ایک بڑی ذمہ داری ہے اور اس کے ساتھ مختلف چیلنجز اور جان کو لاحق خطرات بھی وابستہ ہوتے ہیں۔سری نگر کے لوک بھون میں منعقدہ ایک تقریب کے موقع پر نو منتخب امیدواروں سے خطاب کرتے ہوئے ڈی جی پی پربھات نے کہا کہ یہ دن امیدواروں اور ان کے اہل خانہ کے لیے خوشی کا موقع ہے۔انہوں نے کہا، ’’آج آپ اور آپ کے خاندانوں کے لیے خوشی کا دن ہے، لیکن آپ کو یہ بھی سمجھنا چاہیے کہ وردی پہننا آسان کام نہیں ہے۔ اس کے ساتھ بڑی ذمہ داری وابستہ ہوتی ہے۔‘‘
ڈی جی پی نے کہا کہ پولیس سروس کے دوران اہلکاروں کو کئی طرح کے چیلنجز کا سامنا کرنا پڑ سکتا ہے اور بعض حالات میں ان کی جان بھی خطرے میں پڑ سکتی ہے۔انہوں نے کہا، ’’اس ذمہ داری کے ساتھ چیلنجز بھی ہوں گے اور آپ کی زندگیوں کو خطرات بھی لاحق ہو سکتے ہیں۔ تاہم، مجھے امید ہے کہ تربیت کے دوران آپ کو ہر صورتحال کا سامنا کرنے کے لیے مضبوط اور تیار کیا جائے گا۔‘‘
ڈی جی پی پربھات نے کہا کہ تربیت نو منتخب افسران کو پولیس سروس کے تقاضوں سے نمٹنے، ضروری مہارتیں حاصل کرنے اور اعتماد کے ساتھ اپنی ذمہ داریاں انجام دینے کے قابل بنائے گی۔انہوں نے کہا کہ جب امیدوار پولیس اکیڈمی پہنچیں گے تو وہ ان سے تفصیلی بات چیت کریں گے اور ذاتی طور پر بھی ان سے ملاقات کریں گے۔ڈی جی پی نے نو منتخب افسران کو مبارکباد دیتے ہوئے جموں و کشمیر پولیس میں ان کے کیریئر کے لیے نیک خواہشات کا اظہار کیا۔
