سری نگر/جموں و کشمیر کی وزیر صحت و طبی تعلیم سکینہ ایتو نے نیشنل ہیلتھ مشن (NHM) ملازمین سے اپیل کی ہے کہ وہ اپنی جاری ہڑتال ختم کرکے دوبارہ ڈیوٹی پر واپس آئیں۔ انہوں نے یقین دلایا کہ حکومت ملازمین کی جانب سے اٹھائے گئے مسائل کا جائزہ لے گی اور اپنے دائرۂ اختیار میں آنے والے معاملات کو حل کرنے کے لیے ہر ممکن کوشش کرے گی۔
پامپور میں نامہ نگاروں سے بات کرتے ہوئےایتو نے کہا کہ حکومت نے احتجاج کرنے والے ملازمین کے ساتھ کئی دور کی بات چیت کی ہے اور وہ خود بھی ان سے پہلے ملاقات کرچکی ہیں۔
انہوں نے کہا کہ ”یہ ہمارے اپنے لوگ ہیں اور اپنے مسائل اٹھانا ان کا جمہوری حق ہے۔ حکومت نے ان کے ساتھ کئی مرتبہ بات چیت کی ہے اور میں نے بھی ان سے بات کی ہے۔“
وزیر صحت نے امید ظاہر کی کہ ملازمین صورتحال کو سمجھتے ہوئے ہڑتال ختم کرکے اپنے فرائض پر واپس لوٹیں گے۔ انہوں نے کہا کہ عوام طبی شعبے اور صحت کے کارکنوں پر بہت زیادہ اعتماد کرتے ہیں۔
سکینہ ایتو نے کہا، ”مجھے امید ہے کہ وہ ہڑتال ختم کرکے اپنی ڈیوٹی پر واپس آئیں گے۔ حکومت ان کے لیے جو کچھ ممکن ہوگا، ضرور کرے گی۔“
انہوں نے بتایا کہ وہ متعلقہ محکمہ کو پہلے ہی ہدایت دے چکی ہیں کہ ملازمین کی جانب سے پیش کی گئی نمائندگیوں میں اٹھائے گئے تمام مسائل کا جائزہ لیا جائے۔
وزیر صحت نے یقین دلایا کہ حکومت اپنے دائرۂ اختیار میں آنے والے مسائل کے حل کے لیے ضروری اقدامات کرے گی، تاہم انہوں نے ملازمین سے اپیل کی کہ جاری ہڑتال کے باعث عام لوگوں کو مشکلات کا سامنا نہ کرنا پڑے۔
