ویب ڈیسک —
پاکستان اور سری لنکا کے درمیان تین ایک روزہ میچوں کی سیریز کا تیسرا اور آخری میچ آج نیشنل اسٹیڈیم کراچی میں کھیلا جارہا ہے۔
سیریز میں پاکستان کو ایک صفر کی برتری حاصل ہے۔ دونوں ٹیمیں بدھ کو مقامی وقت کے مطابق سہہ پہر تین بجے مدمقابل ہوں گی۔
پاکستانی اوپنر امام الحق کے ان فٹ ہونے کے سبب آج کھیلے جانے والے میچ میں حصہ لینے کے امکانات کم ہیں۔
امام الحق دوسرے ون ڈے میں سری لنکا کی اننگز کے دوران تیسرے اوور میں فیلڈنگ کرتے ہوئے ہاتھ پر چوٹ لگنے کی وجہ سے زخمی ہوگئے تھے۔ ان کی جگہ عابد علی کو ٹیم میں شامل کیے جانے کا امکان ہے۔
پاکستان نے دوسرے میچ میں سری لنکا کو 67 رنز سے شکست دی تھی جبکہ پہلا میچ بارش کی وجہ سے منسوخ ہو گیا تھا۔
سری لنکن ٹیم کے کپتان لاہیرو تھریمانے پہلے ہی کہہ چکے ہیں کہ ان کی ٹیم تیسرے میچز میں کم بیک کرے گی۔ ان کا کہنا ہے کہ دوسرا ون ڈے ہارنے کے باوجود وہ اپنی ٹیم سے مثبت تبدیلی کی توقع رکھتے ہیں۔
آج کھیلے جانے والے میچ میں کامیابی کی صورت میں میزبان ٹیم سیریز اپنے نام کرلے گی۔ اگر گرین شرٹس کو ناکامی ہوئی تو ون ڈے سیریز کا اختتام برابری پر ہوگا۔
اعداد و شمار کے مطابق دونوں ٹیموں کے درمیان اب تک 153 ایک روزہ میچز ہوچکے ہیں جن میں سے 90 پاکستان نے اور 58 سری لنکا نے جیتے ہیں۔
نیشنل اسٹیڈیم کراچی میں پاکستان کی جانب سے کھیلا جانے والا رواں سال کا آخری ایک روزہ انٹر نیشنل میچ ہے۔ اس میچ کے بعد اگلا ون ڈے گرین شرٹس سال 2020 میں کھیلیں گے۔