اسلام آباد (مانیٹرنگ ڈیسک) جمعیت علماء اسلام کے سیکرٹری جنرل مولانا عبدالغفور حیدری نے کہا کہ ابھی آزادی مارچ شروع نہیں ہوا مگر حکومت بوکھلاہٹ کا شکار ہو کر چار دیواری کا تقدس پامال کرکے ہمارے کارکنوں کو گرفتار کر رہی ہے۔ حکمران ہمارے آنے سے پہلے پہلے استعفیٰ دے کر گھر چلے جائیں ہم پرامن احتجاج کرنا چاہتے ہیں۔ ابھی ہم آئے نہیں اور حکومت نے پہلے ہی ہتھیار ڈال دیے ہیں، خندقیں ایسی کھودی جارہی ہیں جیسے ہم بھارت سے آرہے ہیں، حکومت روکنے کی ہزار کوشش کرلے ہم ضرور آئیں گے۔ پریس کانفرنس کے دوران انہوں نے کہاکہ مولانا فضل الرحمن یا میری گرفتاری یا نظربندی سے تحریک کو فرق نہیں پڑے گا، تحریک مزید آگے بڑھے گی، مذاکرات کا نام لے کر اس کی دھجیاں اڑائی گئیں۔