بارش کے بعد درجہ حرارت میں غیر معمولی کمی سے سردی میں اضافہ ہوگا اور یہ سردی کئی روز تک جاری رہے گی
مغربی ہوائوں کا ایک نیا سلسلہ بلوچستان کے راستے سندھ اور ملک بھر میں داخل ہو رہا ہے، محکمہ موسمیات
کراچی (اسٹاف رپورٹر) شہر میں موسم سرما کی پہلی بارش 15 نومبر بروز جمعہ کو ہونے کا امکان ہے، بارش کے بعد درجہ حرارت میں غیر معمولی کمی ہو سکتی ہے، بارش کے بعد سردی کی دوسری لہر کئی روز تک جاری رہ سکتی ہے۔ شہر میں گزشتہ ہفتے داخل ہونے والے مغربی بارش کے سسٹم کے اثرات کی وجہ سے شہر میں چلنے والی خنک ہوائوں میں بتدریج کمی ہونے کی توقع ہے، پیر کو شہر کا پارہ گزشتہ کئی روز کے مقابلے میں 2 ڈگری اضافے سے 32 ڈگری ریکارڈ ہوا جبکہ صبح کے وقت کم سے کم درجہ حرارت 16 ڈگری ریکارڈ ہوا، دن کے وقت ہوا میں نمی کا تناسب 30 فیصد رہا۔ پیر کو شہر میں شمال مغربی اور شمال مشرقی سمت کی 15 کلومیٹر فی گھنٹہ کی رفتار سے ہوائیں ریکارڈ ہوئیں، شام کے وقت کچھ وقت کے لیے سمندر کی جنوب مغربی سمت کی ہوائیں بھی چلیں، چیف میٹرولوجسٹ کراچی سردار سرفراز کے مطابق مغربی ہوائوں کا ایک نیا سلسلہ بلوچستان کے راستے ملک میں داخل ہو رہا ہے جس کے نتیجے میں اندرون سندھ کے اضلاع جبکہ کراچی میں 15 اور 16 نومبر کے درمیان بارش کا امکان ہے۔