سائٹ ایسوسی ایشن کے صدر سلیمان چائولہ کا سوئی سدرن گیس کمپنی سے مسئلہ حل کرنے کا مطالبہ
کراچی(اسٹاف رپورٹر)شہرقائد میں موسمِ سرما کے آغاز پرہی گیس کا بحران ہوگیا ہے جب کہ ایس ایس جی سی حالیہ شدید قلت کی وجوہات واضح نہیں کرپارہی۔گھریلو صارفین اور کمرشل سیکٹر شدید پریشانی کا شکار ہیں۔ صنعتکاروں نے صورتحال میں بہتری نہ آنے پر صنعتوں کی بندش کے خدشات کا اظہار کردیا جب کہ گھریلو صارفین کوشدید دشواری کا سامنا ہے۔سی این جی اسٹیشنز کی طویل بندش کے باعث شہرمیں پبلک ٹرانسپورٹ کم ہوگئی اوررکشہ اور ٹیکسی مالکان سمیت نجی ٹیکسی سروس نے اپنے کرایوں میں اضافہ کردیا ہے۔ترجمان ایس ایس جی سی کا کہنا ہے کہ سی این جی اسٹیشنز کومنگل کی دوپہر 2 بجے سے گیس کی سپلائی منقطع ہے۔ جمعہ کی صبح 8 بجے تک 66 گھنٹے کے لیے گیس فراہمی بند رکھنے کے احکامات ہیں۔ گھریلو صارفین اور کمرشل سیکٹر کی طلب پوری کرنے میں دشواری کا سامنا ہے۔اورنگی،کورنگی،گلشن اقبال،لیاقت آباد سمیت مختلف علاقوں میں گیس پریشر کی کمی سے بھی گھریلو امور میں خواتین کو شدید مشکلات کا سامنا ہے۔