اینٹی کار لفٹنگ سیل نے کراچی سمیت ملک کے مختلف شہروں سے برآمد کی تھیں جن کو اصل مالکان کو دے دیا گیا
کراچی (اسٹاف رپورٹر) اینٹی وہیکل لفٹنگ سیل نے برآمد کی جانے والی 21 کاریں اور 40 موٹر سائیکلیں قانونی تقاضے پورے کرنے کے بعد اصل مالکان کے حوالے کردیں، کاریں میانوالی، سرگودھا، لاہور، لاڑکانہ، کوئٹہ، مستونگ، لسبیلہ بلوچستان، کوٹری، سوات، اپردیر اور کراچی سے برآمد کی گئی تھیں جبکہ برآمد کی جانے والی موٹر سائیکلیں کراچی، حب چوکی اور لسبیلہ بلوچستان سے برآمد کی گئی تھیں۔ کاریں اور موٹر سائیکلیں اصل مالکان کے حوالے کیے جانے کی تقریب اینٹی وہیکل لفٹنگ سیل ہیڈ کوارٹر شریف آباد منعقد کی گئی، پولیس کے مطابق برآمد کی جانے والی 3 گاڑیاں عزیز بھٹی، 3 گاڑیاں گلشن اقبال جبکہ اسٹیل ٹائون، گزری، شارع فیصل، تیموریہ، موچکو، درخشاں، کلفٹن، سرجانی ٹائون، شاہ لطیف ٹائون، نیوٹائون، سائٹ، گلستان جوہر اور میٹھادر سے چوری جبکہ کورنگی صنعتی ایریااور سولجر بازار سے 2 گاڑیاں چھینی گئی تھیں۔ گاڑیاں و موٹر سائیکلیں وصول کرنے والے شہریوں نے خوشی کا اظہار کرتے ہوئے اینٹی وہیکل لفٹنگ سیل پولیس کی کارکردگی کو سراہا، ان کا کہنا تھا کہ پولیس کی کوششوں سے ہماری چوری و چھینی جانے والی گاڑیاں اور موٹر سائیکلیں ہمیں واپس ملی ہیں۔