بولٹن مارکیٹ ٗ ٹاور ٗ لیاری ٗ کھارادر ٗ نارتھ ناظم آباد ٗ اورنگی ٹائون ٗ کورنگی ٗ سولجر بازار اور دیگر علاقوں میں رات دس بجے تک آتش بازی کے سامان کی فروخت جاری تھی
اچھی قبر بولٹن مارکیٹ کے سامنے واقع گارمنٹس کی دکانوں میں بھی آتش بازی کے سامان کی فروخت ٗ آمنہ پلازہ میں کھلے عام پٹاخہ بم مل رہے تھے
کراچی (کرائم ڈیسک) نئے سال کے استقبال کے لیے شہر قائد کے مختلف مقامات پر ایک ارب روپے سے زائد مالیت کا آتش بازی کا سامان منگوایا گیا۔ کراچی کے علاقوں بولٹن مارکیٹ، ٹاور، لیاری، کھارادر، نارتھ ناظم آباد، اورنگی ٹائون، کورنگی، سولجر بازار سمیت کئی مقامات پر گزشتہ برس کی رات دس بجے تک آتش بازی کے سامان کی فروخت کا سلسلہ جاری رہا۔ بولٹن مارکیٹ اچھی قبر کے سامنے دکانوں میں گارمنٹ کی دکانوں میں ہول سیل پر آتش بازی کے سامان کی فروخت جاری رہی اس سلسلے میں دکانداروں کا کہنا تھا کہ شب برأت اور نئے سال کے علاوہ یہاں شادی کے موقع کے لیے بھی آتش بازی کا سامان ہول سیل ریٹ پر فروخت کیا جاتا ہے، ان کا کہنا تھا کہ آتش بازی کا سامان کھلے عام فروخت نہیں کرسکتے اس لیے لوگوں کو ان جگہوں کا پتا ہے جہاں سے یہ سامان مل سکتا ہے۔ دکانداروں کا کہنا ہے کہ آتش بازی کی زیادہ ورائٹی لاہور سے آتی ہے اس لیے ان کی قیمتوں میں بھی دس گنا اضافہ ہوا ہے۔ شہر کے قلب میں واقع صدر مارکیٹ میں واقع الآمنہ پلازہ کی اندرونی جانب ایک گلی میں ’’سپر فائر ورکس‘‘ کے نام سے جدید آتش بازی کے سامان سے لیس شاپ قائم ہے جس میں کم سے کم قیمت 50 روپے فی پٹاخہ سے شروع ہو کر پندرہ سو روپے تک ہر قسم کا جدید اور خطرناک پٹاخہ دستیاب ہے اس آتش بازی کی وسیع و عریض شاپ میں آتش بازی کے نت نئے سامان موجود ہیں۔ جبکہ شاپ میں تل دھرنے کی جگہ نہیں، لوگ اپنی باسکٹس اٹھائے خریداری میں مصروف رہے شاپ میں موجود مرد، خواتین، اسٹاف لوگوں کو آتشی سامان سے متعلق معلومات فراہم کرتا ہے۔