اولمپکس اور پیرالمپکس پر کرْوز شپ کا ٹرمینل کھولا جائے گا، جاپان

ٹوکیو (جسارت نیوز) جاپان کے حکام نے کہا ہے کہ موسم گرما میں اولمپکس اور پیرالمپکس کے آغاز سے قبل ٹوکیو کی بندرگاہ پر کرْوز شپ کا نیا ٹرمینل کھول دیا جائے گا۔ جاپانی نشریاتی ادارے کے مطابق ٹوکیو انٹرنیشنل کرْوز ٹرمینل، گیمز کے آغاز سے10 دن پہلے 14 جولائی کو کام شروع کر دے گا۔ 36 کڑوڑ ڈالر کی لاگت کا یہ ٹرمینل ٹوکیو بلدیہ عظمٰی تعمیر کر رہی ہے تاکہ تفریحی دوروں کے لیے چلنے والے دنیا کے بڑے بحری جہاز آئندہ ٹوکیو تک آ سکیں۔ یہ منصوبہ ایک ایسے وقت شروع کیا گیا تھا جب جاپان کی بندرگاہوں پر آنے والے کرْوز شپس کی تعداد میں اضافہ ہونا شروع ہوا۔ ٹوکیو کی حکومت کو امید ہے کہ افتتاح کے بعد ششماہی میں ایک لاکھ 80 ہزار افراد ٹرمینل کا دورہ کریں گے۔ حکومت کا یہ بھی کہنا ہے کہ ایک بڑے کرْوز شپ کے دورے سے معیشت میں 18 لاکھ ڈالر کا اضافہ ہو گا۔