میئر کراچی شہر کی خدمت کرنا چاہتے ہیں تو ہم اپنے ساتھ مل کر کام کرنے کی پیشکش کرتے ہیں، عاجز دھامرا
کراچی (اسٹاف رپورٹر)پاکستان پیپلزپارٹی سندھ کے سیکرٹری اطلاعات عاجز دھامرانے کہا ہے کہ پیپلزپارٹی نے پارلیمنٹ کی توقیر کے لیے آرمی چیف کی مدت ملازمت میں توسیع کی حمایت کی ہے ۔ایم کیو ایم وفاق میں بیٹھ کر کس چیز کا رونا رورہی ہے ۔میئر کراچی اگر شہر کی خدمت کرنا چاہتے ہیں تو ہم انہیں اپنے ساتھ مل کر کام کرنے کی پیشکش کرتے ہیں ۔ان خیالات کا اظہار انہوںنے جمعہ کو کراچی پریس کلب میں پریس کانفرنس سے خطاب کرتے ہوئے کیا ۔عاجز دھامرانے کہا کہ کچھ عناصر عوام کی خدمت کے بجائے اپنی خدمت کی بات کرتے ہیں۔پیپلز پارٹی نے کبھی شہر قائد کا فنڈ نہیں روکاہے ۔ڈی ایم سی ہو یا دیگر ادارے انہیں پورا فنڈ ملتا ہے۔بلاول بھٹوکو میڈیا میں یو ںدکھایا جارہا ہے کہ جیسے انہوںنے کہا ہو کہ اگر ایم کیو ایم اتحاد نہیں کریگی تو انہیں فنڈ نہیں دیا جائے گا۔شاید مئیر کراچی سے پیپلز پارٹی کی ترقی کی تیزی نہیں دیکھی جارہی ہے۔پیپلز پارٹی کو فنڈ کی نہیں بلکہ صوبے کو فنڈ کی ضرورت ہے۔پیپلزپارٹی خدمت پر یقین رکھتی ہے۔