پاکستان مسلم لیگ نواز نے تینوں مسلح افواج کے سربراہان کی مدت ملازمت میں توسیع کے ترمیمی بلز کی حمایت کرنے کا فیصلہ کرلیا ہے۔
ذرائع کے مطابق مسلم لیگ (ن) کی پارلیمانی پارٹی کا مشاورتی اجلاس پارلیمنٹ ہاؤس میں ہوا جس میں سینیٹ اور اراکین قومی اسمبلی نے بھی شرکت کی۔
اجلاس میں آرمی ایکٹ میں ترامیم سمیت قانون سازی کے حکومتی ایجنڈے پر غور کیا گیا۔ اجلاس میں پارٹی قیادت کی ہدایات پر آرمی، نیوی اور فضایئہ کے ترمیمی بلز کی حمایت کرنے کا فیصلہ کیا گیا۔
اس کے علاوہ اجلاس میں ملک کی مجموعی سیاسی، داخلی اور خارجی صورتحال پرغور کیا گیا۔
خیال رہے کہ قومی اسمبلی کا اہم اجلاس آج ہوگا جس میں واضح امکان ہے کہ تینوں مسلح افواج کے سربراہان کی مدت ملازمت میں توسیع کے بلز کو منظور کرلیا جائے گا۔