شہر قائد میں مضر صحت گوشت کی من مانی قیمتوں پر فروخت بھی جاری ہے
سندھ ہائی کورٹ نے بلدیہ عظمیٰ کراچی اور سینئر ڈائریکٹرر ویٹرنری کو نوٹس جاری کرتے ہوئے طلب کرلیا
کراچی(اسٹاف رپورٹر) سندھ ہائی کورٹ نے شہر میں غیر قانونی مذبح خانوں اور مضر صحت گوشت کی فروخت کرنے سے متعلق بلدیہ عظمیٰ کراچی اور سینئر ڈائریکٹر ویٹرنری کو نوٹس جاری کرتے ہوئے سینئر ڈائریکٹر ویٹرنری کو آئندہ سماعت28 جنوری کو ذاتی حیثیت میں پیش ہونے کا حکم دے دیا۔ جسٹس محمد علی مظہر اور جسٹس یوسف علی سید پر مشتمل دو رکنی بینچ کے روبرو شہر میں غیر قانونی مذبح خانوں اور مضر صحت گوشت کی فروخت سے متعلق سماعت ہوئی درخوست گزار وکیل نے موقف اختیار کیا کہ شہر میں غیر قانونی مذبح خانے کھلے ہوئے ہیں‘ بلدیہ عظمیٰ کراچی کی ملی بھگت سے شہر میں غیر قانونی مذبح خانے چل رہے ہیں۔ شہر میں مضر صحت گوشت کی فروخت جاری ہے۔ مضر صحت گوشت سے شہریوں کی صحت سے کھیلا جارہا ہے۔ گوشت من مانی قیمتوں پر بھی فروخت ہورہا ہے۔ انتظامیہ کو پابند کیاجائے کہ گوشت صرف کمشنر کراچی کی پرائس لسٹ پر ہی فروخت کیا جائے۔