کراچی پریس کلب پر احتجاجی دھرنا دینے والے اپنے مطالبات کی منظوری کیلئے وزیراعلیٰ ہائوس کی طرف جانا چاہتے تھے
احتجاج میں خواتین ورکرز بھی شامل تھیں ٗ پولیس اور مظاہرین آمنے سامنے زور آزمائی کرتے رہے ٗ دھرنا جاری ہے
کراچی (اسٹاف رپورٹر) پریس کلب پر دھرنا دیے ہوئے سندھ بھر کے سرکاری اسپتالوں کے طبی عملے نے مطالبات کی منظوری کے لیے وزیراعلیٰ ہائوس کی جانب پیش قدمی کی لیکن پولیس نے رکاوٹیں کھڑی کرکے مظاہرین کو آگے بڑھنے سے روک دیا۔ احتجاجی مظاہرین نے سندھ بھر کے سرکاری اسپتالوں میں علامتی ہڑتال جاری رکھتے ہوئے دوبارہ وزیراعلیٰ ہائوس جانے کا اعلان کر دیا۔ تفصیلات کے مطابق سندھ بھر کے سرکاری اسپتالوں کا طبی عملے کا تیسرے روز بھی پریس کلب پر مطالبات کی منظوری کے لیے سراپا احتجاج رہے، احتجاج میں خواتین ورکرز بھی بڑی تعداد میں موجود تھیں، مظاہرین پریس کلب کے مرکزی دروازے پر دھرنا دیے اپنے مطالبات کے حق میں نعرے بازی کرتے رہے، تیسرے روز بھی محکمہ صحت سندھ کی جانب سے رابطہ نہ کرنے کے باعث طبی عملے نے اپنے مطالبات کے حق میں وزیراعلیٰ ہائوس کی جانب پیش قدمی کی تو پولیس نے رکاوٹیں لگا کر مظاہرین کو آگے بڑھنے سے روک دیا، اس دوران پولیس اور مظاہرین آمنے سامنے زور آزمائی کرتے رہے تاہم محکمہ صحت سندھ نے احتجاجی مظاہرین سے رابطہ کیا اور انہیں واپس جانے اور مذاکرات کے ذریعے معاملہ حل کرنے کا کہا، مظاہرین واپس پریس کلب پر جمع ہو گئے جہاں دھرنا جاری ہے۔