حکومت سندھ نے آئی جی پولیس ڈاکٹر کلیم امام کو ہر صورت میں تبدیل کرنے کا فیصلہ کرلیا
ثناء اللہ عباسی اور انعام غنی میں سے کسی ایک پر وفاقی حکومت متفق ہوسکتی ہے،باوثوق ذرائع
کراچی (اسٹاف رپورٹر) حکومت سندھ نے آئی جی پولیس کے لئے مزید دو نام ثناء اللہ عباسی اور انعام غنی کے تجویز کردیئے ہیں۔ذرائع کے مطابق حکومت سندھ نے آئی جی پولیس ڈاکٹر کلیم امام کو ہر صورت میں تبدیل کرنے کا فیصلہ کرلیا ہے اس لیے وفاق کی جانب سے حکومت سندھ کے پہلے بھیجے گئے 3 نام رد کرنے کے بعد حکومت سندھ نے ثناء اللہ عباسی اور انعام غنی کے نام وفاق کو بھیج دیئے ہیں، ثناء اللہ عباسی آئی پولیس خیبر پختونخوا اور انعام غنی ایڈیشنل آئی جی پنجاب تعینات ہیں، ذرائع کے مطابق وفاقی حکومت اور سندھ حکومت میں انعام غنی کے نام پر اتفاق ہونے کا امکان ہے، اس سے پہلے حکومت سندھ نے غلام قادر تھیبو، مشتاق مہر اور کامران فضل کے نام وفاقی حکومت کو بھیجے تھے، لیکن یہ 3 نام وفاقی حکومت نے رد کردیے تھے، جبکہ سندھ ہائی کورٹ نے آئی جی سندھ پولیس کلیم امام کو نہ ہٹانے کا حکم بھی دیا تھا۔