اب خیالات کو بدلنا ہوگا، اداکارہ
کراچی (نیٹ نیوز) معروف اداکارہ مہوش حیات نے امریکی حکام کی جانب سے مسلمان مسافروں سے امتیازی سلوک برتنے پر امریکی فضائی کمپنی ڈیلٹا ایئر لائنز پر جرمانہ عائد کرنے کے اقدام پر خوشی کا اظہار کیا ہے۔ سماجی رابطے کی ویب سائٹ ٹوئٹر پر مہوش حیات نے امریکی حکام کے فیصلے پر اظہار مسرت کرتے ہوئے لکھا کہ ایسے حالات کی وجہ سے ہی ہم آج اس مقام تک آن پہنچے ہیں۔ انہوں نے یہ بھی لکھا کہ اب خیالات کو بدلنا ہوگا، لوگوں کو آپس میں مذہب، پس منظر اور ان کے ظاہری حلیے سے قطع نظر ایک دوسرے سے رواداری اختیار کرنی پڑے گی۔ واضح رہے کہ امریکی محکمہ نقل و حمل کی جانب سے امریکی فضائی کمپنی ڈیلٹا ایئر لائنز پر مسلمان مسافروں کو طیارے سے اتارنے اور امتیازی سلوک روا رکھنے پر 50 ہزار ڈالر جرمانہ عائد کیا گیا۔