اجتماع کے اختتام پر ملک بھر اور بیرون ملک کیلئے 9 سو جماعتیں تشکیل دی گئیں
توبہ کریں اور اللہ کو منالیں تو سب پریشانیاں ختم ہوجائیں گی، مبلغین کا شرکاء سے خطاب
کراچی(اسٹاف رپورٹر) عالمی تبلیغی جماعت کا کراچی اجتماع عالم اسلام کے اتحاد‘ امن و سکون اور ملک و قوم کی ترقی‘ سلامتی ‘خوشحالی اور استحکام کیلئے رب کے حضور رقت آمیز دعا کے ساتھ ختم ہوگیا۔20 ایکڑ سے زائد اراضی پر تل دھرنے کی جگہ نہیں تھی۔ دعا کے وقت تک شرکاء کی تعداد15لاکھ کے لگ بھگ تھی‘ اجتماع کے اختتام پر ملک بھر اور بیرون ملک کیلئے900 جماعتوں( تبلیغی وفود) کی تشکیل کی گئی جبکہ مقررین نے کہا کہ ہماری تمام پریشانیاں ہمارے اعمال کی بدولت ہیں۔ اگر سب لوگ اللہ سے توبہ کریں اور اللہ کو منالیں تو ہمارے حالات ٹھیک ہوجائینگے۔ سب توبہ کریں اور آئندہ گناہ نہ کرنے کا عہد کریں۔ اللہ تعالیٰ رحیم ہے‘ صرف ایک بار توبہ کرنے سے وہ سب کچھ معاف کردیتا ہے۔ دعا تبلیغی جماعت کے معروف بزرگ اور مبلغ مولانا احمد بٹلا نے کرائی۔اس موقع پر ان کا کہنا تھا کہ دعوت و تبلیغی اپنی ذمہ داری سمجھ کر کی جائے۔ ہمیشہ علماء کرام کی قدر اور ان کے مشور ے سے چلا جائے۔