پاکستان ریلوے کراچی ڈویژن نے تخمینے سمیت ایک جامع پروگرام مرتب کرکے ہیڈ کوارٹرز بھیج دیا
کراچی (اسٹاف رپورٹر) پاکستان ریلوے نے سپریم کورٹ کے فیصلے کی روشنی میں کراچی سرکلر ریلوے ٹریک کو آپریشنل بنانے اور بحالی کے کاموں پر مفصل سروے مکمل کر لیا، اس ضمن میں کراچی ڈویژن نے تخمینے سمیت ایک جامع پروگرام مرتب کرکے ریلوے ہیڈ کوارٹرز کو بھجوا دیا ہے۔ ترجمان ریلوے کے مطابق کراچی سرکلر ریلوے ٹریک کے ساتھ ساتھ جھاڑیوں کو ہٹانے، اسٹیشنوں کی بہتری اور تزئین و آرائش کا کام شروع کر دیا گیا ہے، ریلوے انتظامیہ نے گیلانی ریلوے اسٹیشن پر ناجائز قابضین سے جگہ کی واگزاری کا کام بھی مکمل کر لیا ہے، کراچی سرکلر ریلوے کی بحالی کے پہلے مرحلے میں وزیر مینشن ریلوے اسٹیشن سے ڈرگ روڈ اسٹیشن تک کاحصہ آپریشنل کیا جائے گا۔
