یونس خان کا تقرر قومی ٹیم کیلئے مفید ثابت ہوگا،ظہیر عباس

کراچی(اسٹاف رپورٹر) ایشیئن بریڈمین ظہیر عباس نے یونس خان کی بیٹنگ کوچ کی تقرری کی تعریف کرتے ہوئے کہا ہے کہ کھلاڑیوں کو ان کی2009ء ورلڈ ٹی ٹوئنٹی 20 کپتانی کے تجربہ سے بہت کچھ سیکھنا پڑے گا۔ منگل کو سرکاری خبر رساں ادارے سے گفتگو کرتے ہوئے انہوں نے کہا کہ یونس خان کی بیٹنگ کوچ کے تقرری سے مجھے بہت خوشی ہوئی ہے، وہ ایک تجربہ کار بلے باز ہیں اور مجھے امید ہے کہ کھلاڑی انگلش وکٹوں پر کس طرح بلے بازی کریں گے اس کے بارے میں وہ ان کے تجربہ سے سیکھیں گے۔ ظہیر عباس نے کہا کہ یونس کو انگلینڈ میں آئندہ اگست اور ستمبر میں ہونے والے 3 ٹیسٹ اور ٹی 20 سیریز کے دورے کیلئے بیٹنگ کوچ مقرر کیا گیا۔ انہوں نے کہا یونس کے پاس انگلش وکٹوں پر بیٹنگ اور مہارت کا وسیع تجربہ ہے جوکھلاڑیوں کے لئے اہم ثابت ہو گی۔ انٹرنیشنل کرکٹ کونسل (آئی سی سی) کے سابق صدر ظہیر عباس نے کہا کہ وہ انگلینڈ میں وکٹوں کا جائزہ لینا چاہتے ہیں کیونکہ کوویڈ۔19 وبائی وبائی بیماری کی وجہ سے ابھی کافی عرصہ سے کوئی کھیل نہیں ہو رہا۔ دونوں ممالک کے درمیان میچ بہت دلچسپ ہوں گے، انگلینڈ میں انگلش ٹیم کے خلاف جیتنا پاکستان کے لئے آسان نہیں ہو گا۔ ظہیر عباس نے نوجوان بلے باز اور قومی کرکٹ ٹیم کے کپتان بابر اعظم کے بارے میں بات کرتے ہوئے کہا کہ وہ سیریز میں عمدہ کارکردگی کا مظاہرہ کرے گا۔ انہوں نے کہا کہ بابر کو کسی قسم کا دباؤ نہیں لینا چاہئے اور انہیں اپنی بلے بازی پر توجہ دینا چاہئے کیونکہ ہمیں بطور ایک بلے باز کی حیثیت سے ان کی ضرورت ہے۔ واضح رہے کہ یونس خان نے 2000ء سے 2017ء تک محیط اپنے ٹیسٹ کیرئیر میں 118 میچوں میں 52 سے زائد کی اوسط کے ساتھ 10 ہزار 99 رنز بنائے۔ سری لنکا کے خلاف کراچی میں 313 رنز کی اننگز ان کے کیریئر کی بہترین اننگز تھی جس کی بدولت انہیں آئی سی سی رینکنگ میں پہلی پوزیشن ملی۔ خصوصاً انگلینڈ کے خلاف یونس خان کا ریکارڈ خاصا متاثر کن ہے۔ انگلینڈ میں کھیلے جانیوالے9 ٹیسٹ میچوں کی 16 اننگز میں یونس خان نے 50 سے زائد کی اوسط کے ساتھ 810 رنز بنائے۔ اس دوران انہوں نے 2 سنچریاں (اوول 2016ء میں 218 اور ہیڈنگلے 2006ء میں 173 رنز کی اننگز) اور 3 نصف سنچریاں بنائیں۔ حریف ٹیم کے خلاف پاکستان میں کھیلے گئے 2 اور متحدہ عرب امارات میں کھیلے گئے 6 ٹیسٹ میچوں میں انہوں نے مشترکہ طور پر 616 رنز بنائے۔ چیمپئن بیٹسمین نے یہاں 2 سنچریاں (دبئی میں 127 اور 118 رنز کی اننگز) اور 1 نصف سنچری بنائی۔