کراچی: سابق قومی کپتان وسیم اکرم کا کہنا ہے کہ بارش میں ڈوبے کراچی کو دیکھ کر دل خون کے آنسو روتا ہے۔
سماجی رابطے کی ویب سائٹ ٹوئٹر پر سابق قومی کپتان وسیم اکرم نے گزشتہ روز کراچی میں ہونے والی تیز بارش کے باعث شہر کی حالت کو دیکھ کر اپنے پیغام میں کہا کہ شہر قائد کی حالت اور متاثرین کی بیچارگی کو دیکھ کر دل خون کے آنسو روتا ہے۔
یہ بھی پڑھیں: کراچی میں آج بھی بارش کاامکان ہے
وسیم اکرم نے کہا کہ کراچی کو ایک بار پھر ڈوبا دیکھ کر کوئی حیرت نہیں ہوئی، بارش میں ڈوبے شہر کی حالت ہمیں نیند سے جگانے کی گھنٹی ہے؟
وسیم اکرم کا مزید کہنا تھا کہ کراچی میں نکاسی آب حل طلب مسئلہ ہے اور اسی لیے ہمیں اپنے خوبصورت شہر کو دوبارہ ٹھیک کرنا ہوگا۔
Seeing the footage of Karachi underwater and my heart goes out to all affected. I can’t say I’m not surprised that this has happened yet again. A wake up call? No it’s a problem that needs to be addressed period! We need to fix our beautiful city
— Wasim Akram (@wasimakramlive) July 26, 2020
دوسری جانب وزیراطلاعات سندھ ناصرحسین شاہ نے سابق قومی کپتان وسیم اکرم کی ٹوئٹ پر ردعمل دیتے ہوئے کہا ہے کہ میں وسیم اکرم کو دعوت دیتا ہوں کہ میرے ساتھ کراچی کا دورہ کریں۔
انہوں نے کہا کہ وسیم اکرم شہرقائد کی سڑکوں کا جائزہ لیں اوردیکھیں کس طرح پانی کی نکاسی کی گئی ہے، وسیم اکرم اگر آپ مخلص ہیں تو شہر کا دورہ ضرور کریں گے اور اگرآپ نے سنی سنائی باتوں پر بیان دیا ہے تو آپ سے زیادہ غیر ذمہ دار کوئی نہیں ہے۔
وزیراطلاعات سندھ ناصرحسین شاہ کا مزید کہنا تھا کہ وسیم اکرم کے غیر ذمہ دارانہ بیان نے عوام کو مایوس کیا ہے۔
