لندن(جسارت نیوز)انگلینڈ اینڈ ویلز کرکٹ بورڈ نے کورونا وائرس کی وبا کے پھیلائو کے خدشے کے سبب غیر معینہ مدت تک کے لئے قومی انڈر 19 کرکٹ ٹیم کا دورہ آسٹریلیا ملتوی کردیا۔ فروری 2021 میں شیڈول ہونیوالی سیریز کو اپریل میں شفٹ کر دیا گیا تھا تاہم اب دونوں ممالک کے کرکٹ بورڈز نے مشاورت کے بعد یہ فیصلہ کیا ہے۔انگلینڈ اینڈ ویلز کرکٹ بورڈکے ہائی پرفارمنس ڈائریکٹر مو بوبات نے کہاہے کہ اپنے ملک کی نمائندگی کے لئے آسٹریلیا کا سفر کرنا کسی بھی سطح پر ایک حیرت انگیز تجربہ ہوگا ، تاہم دورہ آسٹریلیا کو ملتوی کرنے پر بہت مایوسی ہوئی ۔ انہوں نے کہا کہ یہ فیصلہ دونوں ممالک کی انڈر -19ٹیمزاور ان کی انتظامیہ کے لئے بہت مفید ہے۔انہوں نے کہا کہ موجودہ حالات کو دیکھتے ہوئے واضح طور پر صحیح فیصلہ کیا گیا ہے۔انہوں نے کہا کہ ہم امید کرتے ہیں کہ ہم موسم گرما میں ڈومیسٹک سیزن کے دوران آسٹریلوی انڈر 19 ٹیم کی میزبانی کرنے کے قابل ہوجائیں گے۔