ممبئی —
بھارت کے شہر ممبئی میں پولیس نے فلم اسٹار شلپا شیٹھی کے شوہر راج کندرا کو مبینہ طور پر فحش فلمیں بنانے اور آن لائن نشر کرنے کے الزام میں گرفتار کر لیا ہے۔
چھ سال قبل راج کندرا پر میچ فکسنگ کے الزامات کے باعث کرکٹ سے متعلق سرگرمیوں میں حصہ لینے پر بھی پابندی عائد کی گئی تھی۔
پولیس نے پیر کو راج کندرا کی گرفتاری کی تصدیق کرتے ہوئے بتایا کہ وہ انٹرنیٹ ایپلی کیشنز کے ذریعے فحش فلمیں بنانے اور انہیں نشر کرنے کے ایک کیس میں ’مرکزی منصوبہ ساز‘ ہیں۔
پولیس نے ایک بیان میں کہا ہے کہ راج کندرا پر عائد کیے گئے الزامات سے متعلق کافی ثبوت موجود ہیں اور اس معاملے کی مزید تحقیقات بھی کی جا رہی ہیں۔
راج کندرا بھارتی فلموں کی اداکارہ اور 2007 میں برطانوی ریئلٹی شو ’سلیبرٹی بگ برادر‘ کی فاتح شلپا شیٹھی کے شوہر ہیں۔ کندرا اور شلپا شیٹھی کے دو بچے ہیں۔
اس سے قبل 2015 میں انڈین پریمیئر لیگ (آئی پی ایل) میں میچ فکسنگ کے الزامات کے ایک کیس میں تحقیقات کے بعد راج کندرا پر کرکٹ سے متعلقہ سرگرمیوں میں حصہ لینے پر پابندی عائد کردی گئی تھی۔
راج کندرا اپنی اہلیہ شلپا شیٹھی کی آئی پی ایل کی ٹیم ’راجستھان رائلز‘ کے شریک مالک تھے۔
بھارت میں ’فحش مواد‘ نشر اور منتقل کرنے کے خلاف سخت قوانین موجود ہیں البتہ نجی سطح پر پورن دیکھنے کی قانونی طور پر اجازت ہے۔
ویب سائٹ ’پورن ہب‘ کے مطابق امریکہ اور برطانیہ کے بعد ویب سائٹ پر آنے والی ٹریفک کے اعتبار سے سوا ارب سے زائد آبادی رکھنے والا ملک بھارت تیسرے نمبر پر ہے۔